VII.   Ez ist site der nahtegal

I

Ez ist site der nahtegal, swanne sî ir liep volendet, sô geswîget sie. dur daz volge aber ich der swal, diu durch liebe noch dur leide ir singen nie verlie. Sît daz ich nu singen sol, sô mac ich von schulden sprechen wol: “ôwê, daz ich ie sô vil gebat und gevlêhte an eine stat, dâ ich genâden nienen sê.”

II

Swîge ich unde singe niet, sô sprechent sî, daz mir mîn singen zaeme baz. sprich aber ich und singe ein liet, sô muoz ich dulden beide ir spot und ouch ir haz. Wie sol man den nû geleben, die dem man mit schoener rede vergeben? ôwê, daz in ie sô wol gelanc, und ich lie dur si mînen sanc! ich wil singen aber als ê.

III

Owê mîner besten zît und owê mîner liehten wunneclîchen tage! waz der an ir dienste lît! nu jâmert mich vil manger senelîcher klage, Die si hât von mir vernomen und ir nie ze herzen kunde komen. owê, mîniu gar verlornen jâr! diu riuwent mich vür wâr. in verklage si niemer mê.

IV

Ir lachen und ir schoene ansehen und ir guot gebaerde hânt betoeret lange mich. in kan anders niht verjehen. swer mich ruomes zîhen wil, vür wâr, der sündet sich. Ich hân sorgen vil gepflegen und den vrouwen selten bî gelegen, owê, wan daz ich si gerne an sach und in ie daz beste sprach. mir enwart ir nie niht mê.

V

Ez ist niht, daz tiure sî, wan habe ez deste werder, wan den getriuwen man. der ist leider swaere bî. er ist verlorn, swer nû niht wan mit triuwen kan. Des wart ich vil wol gewar, wand ich ir mit triuwen ie diente dar. owê, daz ich triuwen nie genôz! des stên ich vröiden blôz. doch diene ich, swie ez ergê.

VI

Ob ich si dûhte hulden wert, sôn möhte mir zer werlte lieber niht geschên. het ich an got sît genâden gert, sin könden nâch dem tôde niemer mich vergên. Herumbe ich niemer doch verzage. ir lop, ir êre unz an mîn ende ich singe und sage. waz, ob si sich bedenket baz? unde taete si liebe daz, sô verbaere ich alle klage.